孜然炆雞翼

呢排好鐘意食雞翼(其實我一向都係雞翼怪!)，成日煮腐乳雞翼，薑蔥雞翼，香茅雞翼, 今次唸住自創煮下孜然炆雞翼!因為成日覺得孜然真係好香!煮法好簡單食譜如下:

材料:
洋蔥1大個
孜然粉適量(我建議一路煮一路試味，就番自己口味)
 紅蔥頭5-6粒
蔥段2棵(我鐘意蔥白夠香^^)
雞賢10隻


雞翼醃料:
生抽適量(我鐘意用萬字醬油，佢唔太咸，你放到啲豉油浸住啲雞翼都唔驚)
老抽少少(上色用嫁咋!)
糖少少
麻油適量
胡椒粉適量
醃十分鐘後再撈生粉上去醃20-25分鐘


做法:
1)落油用中火煎香雞翼兩面，再轉小火煎熟，最後轉中火煎多一陣撈起備用, 咁雞翼會無咁油
2)洗鑊後落油用小火爆香紅蔥頭，放洋蔥炒香
3) 加入小許水然後落孜然粉興洋蔥炆一陣，加少少蠔油，少少生抽調味，再落雞翼同蔥段同炆
4)最後落生粉水收乾水份


搞掂!!希望大家都鐘意啦~~

第廿一週@西營盤產檢

因為無事無幹，贊育叫我以後去西營盤健康院做產檢就可以!今朝時間預計錯誤，9點要去到但我早左成45分鐘....=____=吽到8:30 先比入去診所.....所以今次籌號又拎第一.....Hahaha.....第一真係快手快腳!!度高磅重量血壓，跟住見醫生!都係聽下BB心跳，按下你個肚，比啲維他命你，9點35 around 就閃得!!因為比老公傳染左感冒，問醫生拎左全日假番家抖下(我好勤力嫁，平時拎半日假嫁咋~^__^~)

番到屋企，一瞓就瞓到四點囉....haha~~而家既胎動又強烈左!感覺好實在啊~~

要麻辣既麻婆豆腐

哈哈!!其實我真係好鐘意煮野食!!!(好彩有個肯為我洗碗既老公~~) 我既師父係我媽咪!!佢煮野食真係好味到無朋友!!不過有時會喺媽咪既指教下自己又改少少match番自己口味!我另一個favour就係麻婆豆腐，出面好少食到真係麻既麻婆豆腐，所以大家不妨自己煮呀!!!

材料:
一盒大既百福豆腐
搞肉末10-12蚊
蔥粒一大湯匙
寧記麻辣火鍋醬2茶匙(無既可用豆瓣醬一茶匙代替)



肉末醃料:
生抽適量(都係果句，用萬字醬油浸住少少豬肉係無問題既)
老抽少少(調色用)
麻油適量
胡椒粉適量
生粉適量(放生放至收乾大部份水份便可)


做法:
1)下油中火爆香豬肉末(想豬肉唔痴鑊底可以臨煎前落少少油, 我就會落葡萄籽油^^)
2) 之後加少少咁丁丁水煮豬肉再落麻辣醬/豆瓣醬，落少少生抽同蠔油調味(半茶匙至一茶匙),如果覺得咸就加番啲糖，口味既野真係要自己試味)
3) 落豆腐温柔地炒，再放蔥粒同生粉水同炒等佢收乾水份便可(因豆腐會出水，我通常會用一茶匙生粉加少少水去做呢個生粉水)


我同老公都好鐘意食嫁!!寧記麻辣火鍋醬真係好香好麻!!屋企一定要有佢看門口!!

第廿週@贊育結構檢查

今日老公陪唔到我，佢無得睇下芝士波囉~~10am 去到贊育做結構，唔係好多人，幾舒服啊~等左一陣就叫我入房照結構啦~~~


呢度啲姑娘都好好人好細心呀!!會話比我聽呢個係頭，呢度係腦入面， 一切正常!!又問我想唔想知BB性別，其實我都知係男仔，但確認多下都好!!姑娘好快就揾到佢大脾仔，用cursor指住芝士波既男性特徵話我知係仔仔!!仔呀仔!!乜你咁鐘意擘大對脾比人睇嫁!(兩次醫生都好快就睇到!) 啲BB唔係鐘意遮住嫁咩??haha...我話比老公聽，老公話"咩呀仔咁唔知羞嫁?!"笑死我~~~


當見到呀B個鼻唔似我老公，我即刻"啊呢吉帝"(唔係話我老公個鼻唔靚，但最好唔好似佢囉~~wahaha)正當我沾沾自喜時，姑娘話你睇下BB個咀仔係到郁下郁下，見唔見到呀?我即刻呆左!!!咿!!!我無眼花呀嘛??乜呀B個咀好似咁大咁既?!!!咁似我老公既!!!!我唔制呀~~之後又照下個心，四瓣心房都見到，橫隔膜啦，胃啦，腎啦，所有內臟都睇到!!我不得不讚嘆醫學既先進!!呀B間唔史又楂實個拳頭仔，好可愛!當照到最後，姑娘話照多次個心就走得，我唸住可以離開之際，芝士波開始唔合作啦!!可能騷擾佢瞓覺，佢突然扒底個身，咩都照唔到!姑娘推下我個肚，又轉下身，都唔成功!!最後呀仔搞到我要喺出面坐幾次冷板凳搞到十一點幾先走得.....

又去探果間粥舖，食完就番工lu~~~~


仔呀仔，媽咪好期待你出世啊!!唔知你個樣會係點既呢??