呀仔一歲啦

呀仔一歲啦！時間瞬間已過！回想起上一年，24號早上六點見紅老公陪伴入院，由早上九點幾一直痛到夜晚九點幾，喺醫院沖完涼就穿水了，姑娘立刻幫我種豆入產房，我十點幾開始覺得好痛，喺產課不停行同坐生產球，到十一點幾十二點已痛得很厲害，有一種急大便既感覺！到一點幾我頂唔順啦，要求打無痛，簽哂紙打左後成個人鬆哂！一直到四點幾，先開得4度，醫生話我宮頸開得慢再比四個鐘我，如果無進展就要開刀！一直瞓瞓到腰骨痛，又開始發燒添！我果一刻好驚，不停祈禱！到8點幾開左六度啦！之前驚啲無痛藥重唔敢加藥，姑娘問我做咩唔加藥如果仲有少少痛！我按左一次掣後咩痛都無哂！醫生話我開得慢不過比我繼續試順產，到二點幾，我終於開到十度啦，姑娘要我停無痛藥一個鐘後試生（正常要停兩個鐘的，不過我一直話我好有力氣！）嘩！停藥後痛不是重要的一環，急屎急到想疴但要死忍先辛苦！過左半個鐘，我急到瀨，問姑娘我可唔可以試生啦！姑娘話你有力咪試囉！我緊係試啦！不過醫生一直check宮頸都話摸唔到呀仔個頭！但都要我繼續疴呀仔！我試左成個鐘都唔得，用力谷到塊面微絲血管爆哂！當然啦！因為呀仔太長個頭歪左不是對正產道，且面向天位置不靚！最後醫生要用吸盤！剪開我下陰揾野勾住塞個吸盤入黎，我一直無叫但呢一刻我忍唔住大叫！女人最痛莫過於用吸盤！醫生不夠專業吸左我仔個頭7次都吸唔出（因為胎位根本不靚），最後嚇親呀仔疴左大便吸入胎糞水致肺炎，心跳呼吸減弱，要緊急開刀！我聽到有得開刀我放下心頭大石！因為用吸盤真係好痛，痛到我雙腳合唔埋！推我入手術室因為事態緊急，佢話麻醉藥未起作用但要開我個肚...我身心極度疲憊同驚，喺有感覺既情況下比人開左個肚...終於七點三十四分生左呀仔，3.775kg,52cm 長！但因為呀仔生命有危險，沒讓我望一眼就送左上深切治癒部😭😭...佢個頭比人吸到痛到不停喊要食止痛藥！我果一刻好擔心....生了足足22個鐘食了全餐！肚一個大傷口，下陰亦一個傷口！傷口之痛我整整一個月才可以自己起到床！傷口痛住但我第二天就上病房見呀仔！仔呀！因為媽媽無堅持去私家生你令你出世受苦了...媽媽以後一定會更堅強去保護你！不會再理任何人！我理得同佢發生世界第三大戰呀！媽媽很愛你！兩個大傷口忍住強大既痛楚一直堅持餵母乳給你！餵到你一歲啦！途中又乳腺炎又唔夠休息而病！雖然辛苦但呢份堅持令我驕傲！生完個肚既傷口一直痛，不停去醫院覆診發現傷口附近有個血塊泡泡，導致我傷口成日痛痛足2個幾3個月，痛到不能抱你！差啲就要開多次刀處理！言仔，媽生你真係好辛苦！見到你現在識行識走很恩惠！仔，你是我呢一生最大的成就！I love you!

我番黎啦！

大家！我番黎啦！一直忙住餵母乳，湊仔，一直凋空左呢度...其實一直想寫blog,但我每日既時間都比哂奶泵同個仔...hahaha

呀仔喺2015年3月25日出世！而家已經就黎十一個月啦！我會好努力更新番之前既生產過程同成長月誌！希望第時呀仔睇番會感激我呢個媽媽啦！

比幅相大家睇住先啦！

哥倫布炸豬扒(芝士火腿豬扒)

呢個炸豬扒我細個成日食嫁，因為我媽整呢個叻!!最近成日都唸起佢，星期日見得閒，好!!我就挑戰下自己既刀功!!

材料:
豬扒數塊(買急凍豬扒易啲起雙飛!但因為我有bb，所以我買左新鮮豬扒)
火腿數塊(視乎你有幾多豬扒，我買金妹嘜每塊分2邊, 一邊包一塊豬扒)
芝士數塊(一塊芝士我會分4格，可包4 塊豬扒)
雞蛋一隻
面包糠一包
粟粉適量


醃豬扒:
都係生抽、麻油、胡椒粉、生粉


做法:
1) 把豬扒一分為二，但尾端不要切斷(起雙飛)，然後加醃料醃佢一個鐘
2) 之後把豬扒打開夾上火腿及芝士，然後用粟粉完全封好條邊，再用內鬆槌圍著邊搥至完全黏上
3)在豬扒兩面抹上大量粟粉，然後放入發好的雞蛋中沾上蛋汁，之後再沾上面包糠
4) 所有豬扒做好後，用小火慢慢把豬扒炸熟，最後用大火炸一陣把油逼出黎


温馨提示:
1) 一定要用小火炸，因為面包糠好易燶
2) 如果炸得太久，芝士就會流出
3)記住用大火逼番啲油出黎呀

夜上海@Marco Polo Hotel

今日係老公二姐生日，所以我地一行9人book 左Marco Polo hotel 既夜上海食晚飯!呢間餐廳入左米芝蓮，水準一向都keep 到，好好味嫁!!推介!!

招牌一字骨!!肉身炆得淋滑，個汁好開胃!!我地每次必叫既美食之一!

蘿白絲穌餅!水準之上~~

呢個糖心熏蛋又係必食!!超好食!!個蛋黃甜甜地又溜心，我唔like 食蛋黃都成隻食哂!!

呢個又係必叫既!!因為夜上海啲XO醬放埋入去左齊食真係好惹味嫁!!

小籠包~~無咩大感覺~~

夜上海中我既至愛!!糖醋炸鱔糊!!佢炸得超香脆又唔漏!個糖醋又好開胃!!大愛!!

奶油津白!比出面出色好多!!個汁好香咸火腿味!!

涼拌海蔘!無咩大感覺

醉雞!!無得食因為有酒!

生煎包!唔漏有肉汁，啲肉又好彈牙!

 煎鍋貼!!廚師煎得好番，入面既都肉打得好彈牙!

涼拌粉皮!!無咩大感覺~~

我既甜品--粟子露!!好番粟子味又唔係好甜!!

另外我地叫左2碟上海粗炒，都好出色，無出面既油膩感!!其實應該仲有叫其他野，但我掛住食無再影相~~哈哈!佢地有叫酒釀丸子!我唸都好好食!!今餐真係大滿足啊!!!

第廿九週@產檢at 私家

噢!!一個月又過去!!最期待總係去私家產檢!!因為又可以見下芝士波個樣!!哈哈!!有鑑於上次佢成日郁手郁腳用隻手遮住塊面，所以我前兩三日已經做好準備，努力胎教下芝士波!我成日同呀仔講:「仔呀仔，你唔好再用雙手遮住個樣啦，要比daddy mummy 睇清楚呀，乖!!!」


今日請左下午假做產檢，老公仲放緊假，所以十二點放工老公就喺公司樓下接我!!我地搭車去尖沙咀，例牌動作---去星座冰室食蕃茄面!!!我忍唔住破戒食左公仔面啊!!!!!~~~呀仔，唔好吸收啲公仔面呀~~~~之後時間尚早，去Pacific coffee坐低飲杯朱古力!!!好味啊!!

去到診所，仲繼續努力叫呀仔唔好遮住塊面(胸有成竹咁!!)，終於輪到我照超聲波啦!!好期待!!點知.....醫生同我講，「bb 用背脊"duck"住我，個頭仔仲塞到好低，今次唔能夠照到bb 個樣啦!!仲要用另一儀器先可以度到頭圍呀!!」我聽完真係好失望啊!!!心唸呀仔一定係專登嫁!!!老公仲不停同我講BB 咁細邊識咁多野!!!我緊係希望係真啦!!唔係太有性格都幾難教~~~可幸係呀仔一切正常!!而家3磅8安士啦!!!仔呀仔，你出世時千祈唔好做巨B呀，唔係呀媽生你就辛苦啦~~~

睇醫生，番屋企揾爸媽食飯!!!兩個星期後再見醫生!!!希望見到呀B個樣啦!!!

元旦BBQ @ 二姐會所!

2015年元旦，新開始一定要約下好朋友見面啦!!我就約左林珍妮+男友仔，呀鼠，同二姐+姐夫仲有我老公一齊黎燒慶佢!!二家姐會所個爐太正，好難唔再去佢果度!!我前一晚醃左30隻叉燒醬雞翼，二家姐就整ribs同香蕉朱古力醬麥包!!嘩!!唸起都正!!好!!去相先!!

懶人爐!!放到幾多野!!雜丸，翠肉瓜，金菇，蕃薯(超甜!)，仲燒緊豬項肉!!!切片加塊烘過既面包夾埋真係勁好食啊!!

仲有大蝦，燒椒仔同雞翼!

二家姐個ribs整得好淋!!姐夫仲加埋TEXCO BBQ汁，拼得住出面啲ribs!!

BBQ 必有恩物!!!johnsonville芝士腸!!!好好味!!

呢度只係幾幅相，我又掛住食無再影啦!!仲有豬扒，呀媽牌黑椒雞扒，粟米等等等....食到抖啖氣都好辛苦!!!

 滿足既好開始!!祝大家都有個美好既2015年!!!Happy New Year!!!!

2014年最後一日去高茶啦喂!!!

今日係2014年最後一日，公司可以早放3點!!好野!!!最後一日，當然要食好啲啦!!中午拉大隊去吉敏吉列豚食LUNCH!!之後等3點就同大家姐去啓德游輪碼頭去HIGH TEA 啦!!


呢間野性價比好高!!兩個人先2百幾蚊，啲甜品水準拼得住酒店!!只係地點吊腳了點!我地都係搭的士去....

望落去都幾吸引嫁!

我杯特濃朱古力有75%可可!!好滑!!!大家姐要莫加~~

有左bb後我對朱古力瘋狂愛上!!!見埋我最like既果撻，我極之興奮!!

呢個焦煻燉蛋好好味!!蛋入面有雲呢嗱籽好fresh，蛋亦整得好滑!!

呢個有酒我無食!!聽大家姐講都好味!

咸點一向唔係我至愛!scone都可以，當然酒店好吃啲!三文治無食哂....因好飽

呢個太熱氣我唔夠膽食!!大姐話炸魚有澳洲既水準!我食啲薯條就覺得好脆!!

可以望到海嫁~!不過太猛太陽，我就唔到角度影得差啲~~haha

後加今日下午既LUNCH!!都唔差喎!!豬扒炸得鬆脆!!磨左芝麻可以加辣既燒汁!!好味!!

2014即將完結!!!下年多大呀B陪我過添啦!!期待2015的來臨!!希望大家身體健康，成日食好野!!!!YEAH YEAH!!