自家製蔥油香芧豬扒飯+ 川貝無花果燉梨

今朝同婆婆仔飲完茶，我同傻雞老公就番daddy 屋企坐左陣先番自己屋企煮飯啦!自從爸爸差啲就離開左我到現在，頻撲既日子維持左兩個月有多，好耐未煮過飯，亦好耐無乜寫日記!喺呢度我好想多謝我傻雞老公，喺佢放大假既日子而我要番工時，佢就代我照顧daddy，佢真係好錫我一家! 令佢個半月假就咁無左....所以今日要做番個煮飯婆慰勞佢!!


見佢成日都掛住香芧雞翼同豬扒，我就整比佢試下啦!


蔥油香芧豬扒飯
材料:

• 雞翼+豬扒(有骨好食啲，用鬆肉鎚整鬆佢)
• 香茅2條(切碎，不過下次試下磨蓉應該更入味)

*肉類我通常用生抽，小小老抽，麻油，胡椒粉，生粉醃!但因為今次雞翼溶唔切雪，我加埋薑汁酒!再加埋香茅醃一至兩個鐘!


蔥油:

• 蔥切粒(視乎你愛蔥油既程度，我用左6棵)用一茶匙糖，一茶匙油，少少胡椒粉，2-3茶匙麻油醃!
• 而油就燒紅鑊用洋蔥半個、6粒蒜(切片)，蔥段(2-3棵)、薑片(5-6片)爆香!之後隔渣將油倒入醃好既蔥粒度!(超美味呀~~~~)

做法:

• 醃好雞翼豬扒拎去炸!就係咁簡單!^__^!建議用中至大火炸香兩面，再用細火慢慢炸熟!最後轉番中火炸一陣迫番啲油出黎，肉就無咁油淋淋嫁啦!
• 之後加上蔥油，搞掂!

爆香緊啲油，真係好香!!

完成了的蔥油!!

醃左一個鐘既豬扒同雞翼，有時間既話非常建議醃耐啲!最好醃過夜!

 製成品!

同場加演川貝無花果百合雪耳燉雪梨!好潤!呢個就黎轉秋既季節好易喉嚨唔舒服感冒，飲呢個就啱哂啦!!

川貝無花果百合雪耳燉雪梨

ENJOY !!!!!