今日要2點去到瑪麗醫院聽講座，不過我好早就醒左啦!!因為我7點幾扎醒左就不停思巧究竟我順產定開刀好呢?順產既話我一定揀公立(因為邊度生都係會劇痛)開刀我一定揀私家, 揀個信得個而且有經驗好手勢既醫生主診!!!爸爸媽媽都想我順產，因為佢覺得坐月我可以補得好啲!而奶奶知我會去私家生仲嬲左我，搞到我好唔開心又有好大壓力!
其實我個人真係好忍得痛!!因為我對腳唔好要成日睇物理治療，個治療師好大力按我我都唔會叫一聲!!而做衝擊波果種痛到入心既感覺我都係堅持唔會叫出黎!(隔離啲足球員都電到叫哂救命咁....)我呀爸有一次同我講"囡呀, 你自然生到就試下啦，況且你都好忍得痛既，我仲記得帶你去矯正腰骨時，個醫師不停扭你啲骨你都叫都唔叫一聲，隔離個女人叫到勁大聲了..."其實我真係唔怕痛,但我有好幾個concern:
如果順產:
我聽好多第一胎既人講，第一胎至少要痛7至10個鐘以上(姑娘都係咁講)，我唔驚痛，只係驚自己唔知會痛幾耐，因為好多媽媽痛左十幾個鐘都生唔出，因為咁樣影響呀B心跳同呼吸變差，個頭會腫，最後要緊急開刀挨多刀!因為太多突發野控制唔到，我最驚影響到呀b!
當然我知順產都有好幾個好處，如平好多啦，生完都係幾百蚊，另外對媽媽bb 都好,bb 經掙扎而出黎心肺功能呼吸會好啲!而順產完可以即刻坐月補番!!
如果開刀:
聽好多開刀同事講開刀好舒服!!唔駛經歷陣痛，推入去半身麻醉半個鐘內就聽到呀B 喊聲!!小好多突發事件影響呀b 健康! 之後私家有塞patpat 藥同勁力止痛藥加托腹帶，生完落床都唔係咩野點痛(我成日覺得啲皮肉之痛我一定忍到，但陣痛呢家野真係無法想像係點)!之後出院都無咩食止痛藥!!快靚正!!另外開刀知邊日入院，老公一定可以喺側邊陪我~!
不過私家都有唔好處，就係要過成30-45日先可以開始補身體!!啲老人家成日話開刀身體會入風，對媽媽健康無咁好!~另一個唔好處就係私家生仔比公立貴好多倍!!
唉!!所以都好掙扎唔知點好!!但又差唔多要喺私家留位了!!問老公老公又話最緊要我自己點唸!!(好費...)佢話如果唔理陣痛果啲痛，佢其實想我試下順產，因為佢覺得呢個方法始終自然啲對我無咁傷!!但佢最擔心同心痛就係驚我好痛.....唸黎唸去!!把心一橫豁出去!!試下順產先啦!!!我仲後生，有氣有力!!應該應付到既!!!其實我一早save左一筆開刀既費用，錢方面絕對唔擔心，不過今日有一刻突然閃過一個唸法....就係8萬蚊並唔係一個細既數目，我save既呢筆錢比埋芝士波用咪仲好?佢可以夠上一年既活動課程啦!!!(突然覺得自己既母愛好偉大!!hahahaha)仲有自我安慰自己唸咁多都無用, 個個都係咁生嫁啦，好多野都唔到自己控制時不如認下命!!你唔試永遠唔知自己痛幾耐,幾耐先生得出!!!可能我忍到呢啲陣痛呢?又可能我好快生得出呢??呢啲全部都係天主既安排!!!我可以做既就係將自己交託比天主，求天主保守我吧!!!
決定左後老公當然好支持我啦!!去瑪麗醫院聽呢個講座就變得更加重要啦，因為佢今次講既係分娩既過程!!原來分娩有分3個時期，等開1-3度子宮頸係第一時期，開左3度可以去產房啦!第二時期係生產既時候!最後時期係後期工作如醫生護士幫忙拎胎盤出黎,同埋縫會陰傷口!!姑娘話瑪麗好少會剪會陰，因為通常都夠位生，除非呀B個頭真係好大啦!!不過剪同埋縫會打麻醉先, 唔駛擔心!另外醫院都有好多止痛方法(雖然好多人都話無咩大作用)....不過都已經好過咩都無!!姑娘提醒我地點吸笑氣, 因有啲媽咪其實痛到自己咩都吸唔到以為自己喺度吸緊!!我上網見到好多媽媽講無痛分娩既偉大力量, 席間我都不停問關於呢個既問題!!呵呵!!瑪麗係廿四小時都有呢個服務!!我會爭取用嫁啦!!!!用唔用到就聽天由命啦!!
個講座聽到4:30 鐘，感覺瑪麗啲姑娘都好好，亦因呢個講座了解多左好多!!!加油啦我呢個媽媽!!!
之後搭車去寶琳，去老公小學同學屋企gathering!!食薩莉亞意式餐廳!!好多人等位啊!!!我第一次食， 原來咁鬼抵食嫁喎!!啲spicy chicken wings好得喎!!食飽玩左陣board game就走lu~~
沒有留言:
張貼留言