第十五 週@贊育第一次見醫生

今日約左下午三點去贊育產檢, 番左半日工十二點正離開公司，老公喺樓下接我同我去食晏，之後我地就搭車去贊育啦!!

因為呢排佔中,所以我地早左搭車出去，點知交通又無預期咁差，我地早左成個鐘到左!!!但因為太熱,所以我寧願喺贊育坐嘆冷氣!!


今日成日都心情好靚,因為我成日以為公立醫院產檢都好似私家咁有超聲波照!唸住又可以見下芝士波!!!點知等到四點半先有得睇，仲要係咁二用個胎心機聽下個心跳正唔正常就走得.....等得耐但睇得果5分鐘....不過芝士波健康正常就好了!!!醫生話我個唐氐檢查都好正常無咩野!不過席間醫生問我有無家族遺傳病，我話daddy 有糖尿, 就因為咁醫生寫紙要我去瑪麗抽血驗血糖....我唸應該無野既, 因為我好少食甜野....睇完後醫生無啦啦開左啲維他命我去拎，我去到藥房佢比左一個半月既meterna 我，我仲拎住個銀包等佢收我錢, 藥劑師望住我，同我講搞掂嫁啦, 你走得嫁啦!!我當堂呆左.....乜政府醫院睇醫生拎藥唔駛錢嫁??嘩!!happy happy!!媽咪明明話要錢既...之後約埋11月3日大概20週鬆啲做結構檢查!!搞掂走人!!!我地由二點喺醫院到差唔多5點半先走!!omg!!!

芝士波又叫肚餓!!我真係覺得我成日好快肚餓, 所以去西環一間老字號粥舖食炒面!!果度啲炒面超好食!!佢地既面條係好幼果隻，唔似而家出面全部都粗到好似米粉咁, 所以炒出黎特別入味!!!我唸市面上都好少有舖頭可以做得咁出色!!老店絕對有好大既生存價值!!慶幸我仲有機會食到啲舊風味既食物!!唔知芝士波第時有無機會食到呢??(呵呵,不過唔緊要, 我會話比佢聽你喺媽咪個肚入面食左!!^____^)


點之走人時先恐佈!!交通被灘渙了...我地唸住由贊育行去西環搭小巴去土瓜灣再轉巴士番媽咪屋企食飯!!點知小巴站前所未有咁長龍，前面個呀叔仲不停鬧啲佔中人士點擾亂交通不停爆粗!!我見勢色唔對等左一陣就同老公講我地去港澳碼頭搭巴士好了!!好似有排都唔會有小巴!!!如是者又行左15分鐘...點知去到巴士總站，原來全線巴士因佔中而停駛...我終於明白點解果位呀叔咁火爆啦!!不過我理解佔中背後動機，所以唯有揾方法離開港島啦~!!老公驚我對腳負荷唔到(我都覺得好神奇我竟然可以由贊育行到去港澳碼頭...)所以不停叫我搭的士番沙田算....哈哈!!不過我一向覺得應駛得駛，2 個人搭的士太浪費資源又唔環保, 所以我緊持搭地鐵(雖然我對腳已經好累....)!於是，我地又行去上環MTR....地鐵好多人啊，不過最後都成功去到九龍塘搭巴士番媽咪度.....


噢, 辛苦既一天啊!!希望香港可以少啲紛爭啦!!我唔想見到一我直長大既香港慢慢失去和諧同競爭力!!真係會心傷的....